القاهرة , أ ف ق
رساله الي من يهمه الامر بقولك ايه ياكبير الميه مقطوعه عن الكفر والناس مخنوقه وجيوبنا فاضيه من قله الزرع والحج محمود المليجي الله يرحمه ويفشفش الطوبه اللي تحت راسه قال البلد دي قامت عشان كنا رجاله ووقفنا وقفه رجاله بس لامؤاخذه يا كبير بعد ما البت هنادي بتعت الجرجير بقت تبيع الربطه بجنيه والواد فلافل خلي قرص الطعميه بنص جنيه والواد العربجي زود الاجره نص جنيه صدقني يا كبير البلد دي هتولع ومش بعيد تصحي من النوم متلقيش رجاله او ينقرضوا بص ياكبير انا عارف اني عشان صارحتك بالحقيقه هكون خاين وعميل بس الحقيقه انا خايف ع البلدي وصارحتي نابعه من ضميري واتكالي علي ربنا ابوس ايدك يا كبير افتح الميه ع الناس الزرعه هتموت والناس كمان هتموت خلاص ولاد الكفر مش عارفين يتجوزوا والبنات عنسوا في بيت اهلهم والصنايعي هنج من الاسعار وحسن افندي موظف الحكومه جيبه فاضي من اول الشهر وبيكمل عشاه نوم ابوس ايدك وانت بتفكر تخترع افتكر بهانه الغلبانه والواد عماد العبيط افتكر ابله فضيله وسياده السفير ورش رشه ع الغلابه وافتح عنيك للوشوش مش كل ضحكه خافت من حبستك هتبقي صوت دي ضحكه صفرا بتاخد من قلوبنا القوت فارحم ضعفاء كفرنا وارحمنا برحمتك الله يخليك
